إجري يا فكرة
********
جوه دماغي إجري يا فكرة
إجري بسرعة جوه ضلوعي
إجري وقيدي كل شموعي
من كام يوم جيتيني يافكرة
والليلة قلتي دا سبوعي
ومش هاقدر أستنى لبكرة
إجري .. جوه ضلوعي يا فكرة
قفلتي وحبستيلي بحر دموع
وجبتي لمراكبي ياما قلوع
وغرقت في بحر هواكي يومين
لأ شهرين .. قولي سنتين
تايه ولاعارف للسكة رجوع
وسنين عمري ماهياش ذكرى
إجري .. جوه ضلوعي يا فكرة
أيوه أنا شايفك .. لأ مش شايف
إوعي تقولي عليا أنا خايف
جريّت وراكي بسمة شفايف
وقلب سابح في هواكي طايف
شايل جواه حلاوة جميلة
إيشي بسبوسة ، كنافة ، قطايف
لجل ماتبقي دايماً فاكراه
ولايجيش يوم ويصبح نكرة
إجري .. جوه ضلوعي يا فكرة
إجري في ليلي ووسط نهاري
إوعي تخبي وإوعي تداري
مهما معانيكي معايا تطلسم
عمرك ماهاتغلب يا حماري
هاتجيك لحظة وبرضك تفهم
مانتي بنت بنات أفكاري
مولودة على إيديا دولم
المرفوعة حامدة وشاكرة
وإجري .. جوه ضلوعي يا فكرة ...